Athora gizonezkoen alkandora da eta Manthara emakumezkoena. Gure kulturari estuki loturik egon den jantzia izan da alkandora. Euskal jantzigintza tradizionalean badugu horren islada.

Jantzi honen interpretazio garaikide bat egiteko saiakera da hau.

Material natural ezberdinak baliatuta eta mozketa berritzaileekin jolastuz, etxe honetan beti aurkituko dituzu lepo esanguratsuak eta aurrealdea irekita daroaten jantziak.

Irauteko sortzea aktibista izatea da gaur egun.

Jantzigintzak, patroigintza eta joskintza hartzen ditu bere baitan.

Bi lanbide hauek elkarri lotuak diren arren oso jakintza ezberdinez osatuak daude. Patroigintza matematika eta proportzioetan oinarritzen bada joskintzan jantzi baten egitura menperatzea, xehetasuna eta teknika behar dira.

Atelierra bezeroari zabalik dagoenez, eta patroitik moztu eta josterainoko prozesu osoa bertan egiten dudanez, jantzia pertsonalizatzeko aukera eskaintzen dut.

Proiektu hau 2013an abiatu banuen ere, 7 urte dira Saran atelierra publikoari idekia dudanetik. Produkzio lokalari bere balio emanaz, hementxe ekoizten ditut Athora Manthara izenarekin plazaratzen ditudan jantzi guztiak.

Ateleriatik pasatzen den edonork ikusi dezake jantzigintza prozesu osoa. Patroia sortzetik, oihalak moztu eta josterainokoa.

Moda produktuak non eta nola ekoitziak izan diren ez dakigun garai hauetan, jantzigintzari begirada duin bat egiteko oasi txikia da atelier hau.